Eu

Chámome Vitor, nacín en febreiro do ano 86 do século pasado na vila de Palas de Rei. Estudo na EUAT (Escola Universitaria de Arquitectura Técnica) da Coruña. Comecei no curso 2006-2007 tras facer un ciclo de “Desenvolvemento e aplicación de proxectos de construción” -o antes coñecido como Delineación-. E estudar é no que ocupo o “tempo de obriga”.

Sen embargo, o tempo de lecer pásoo repartido entre:

Estar diante do ordenador, que normalmente non se pode considerar tempo perdido, posto que sempre procuro estar lendo sobre algo interesante. Proba disto son os case 100 blogs aos que estou subscrito. Ademais intento entrar neste mundo do “software libre”, e son usuario (unha parte do tempo) de GNU/Linux.

Tamén uso gran parte do tempo en practicar algo de deporte. De feito as fins de semana téñoas ocupadas entre montar en bicicleta (Bicicleta Todo Terreo) e máis no C.B. Palas. Esta actividade física no verán pasa a intensificarse debido ao tempo libre que caracteriza aos estudantes.

E a partir de aquí supoño que me caracteriza o que a calquera da miña idade: ver cine (bastante menos do que me gustaría), escoitar música (non saio sen o meu iPod Shuffle a ningún lado), ler (cada vez menos novelas), sair de esmorga (que non sair a emborracharme).